Në teatrin Real në Madrid, sopranoja shqiptare Ermonela Jaho ka interpretuar operën “Thais” në krah të tenorit Placido Domingo dhe ka mahnitur të gjithë publikun. Mbrëmja  jehoi me zërin e këngëtares shqiptare, e cila është shoqëruar në fund për minuta të tëra me duatrokitje të zjarrta nga publiku spanjoll. Placido Domingo, në rolin e tenorit, dhe sopranoja shqiptare Ermonela Jaho, në rolin e kurtizanes –shenjtore, kanë ngritur publikun në këmbë. Siç kanë shkruar edhe mediat spanjolle, duartrokitjet kanë vijuar për plot 18 minuta. “Thais” është udhëhequr nga dirigjenti i njohur Patrick Fournillier. Magjia e Domingos dhe Jahos ka depërtuar edhe te publiku, aq sa në fund, artistja shqiptare nuk i ka mbajtur dot lotët nga emocioni.

Ermonela Jaho është shumë e njohur në teatrin “Real” për interpretimet e saj të mrekullueshme të “Traviatës” dhe të “Madam Butterfly”. “Thais” është një rol i komplikuar si në nivel vokal, ashtu edhe në nivel interpretimi, por artistja shqiptare nuk njeh sfida kur është fjala për vepra të mëdha të këtyre përmasave.

Mahnitëse ishte edhe veshja e artistes shqiptare në skenë, e cila nuk është lënë jashtë komenteve. Gjatë pjesës së parë, ajo kishte veshur një fustan të ngushtë të kuq, ndërsa në pjesën e dytë doli me një fustan jeshil me lule të qëndisura.