Jonida Maliqi të hënën niset për Suedi për tu përgatitur për Eurovision. Këngëtarja do përfaqësojë Shqipërinë me këngën ‘Ktheju tokës’.

“Po përgatitem fort. Do jem e vetme në skenë, sigurisht me back vokalet. Nuk do kem performancë me koreografi. Po punojmë shumë për pjesën vizuale, grafike. Do e këndoj shqip, nuk do ndryshoj asgjë përveç disa parametrave që i kërkon Eurosong. Të hënën nisemi në Suedi për të realizuar audion dhe mastermix-in e këngës. Jam shumë entuziaste.”

Këngëtarja shtoi se është shumë e sigurtë për prezantimin që do bëjë në Eurovision me ‘Ktheju tokës’.

Jonida u shpreh se fitimi i ‘Festivalit të këngës’ ishte surprizë e madhe për të. “Ishte befasi, një surprizë e madhe sepse unë prej kohësh isha shkëputur, jo se më vinte si pjesë e domosdoshme e kompeticionit pasi i kisha arritur deri diku qëllimet e mia. Qëllimet nuk janë vetëm trofetë që fiton ndër vite por edhe të qënurit gjatë gjithë kohës në garim, në kompeticion. Nuk doja të isha pjesë e kompeticionit, pasi nuk doja ankthe, siklete. Pasi dëgjova vijën melodike të kënduar nga  Erjona pa tekst u emocionova. Ato dy minuta mishin e kisha mornica mornica.”