Pavarësisht kritikave në “Eurovision 2022”, Ronela Hajati ka bërë për vete mijëra fansa nga e gjithë Evropa. Këngëtarja, e cila na përfaqësoi me këngën “Sekret”, u kryqëzua për performancën dhe veshjen, mirëpo shumë të tjerë nuk ndanin këtë mendim, të cilët e vlerësuan për energjinë që dha.

Këtë e ka dëshmuar dhe njëherë pjesëmarrja në një eveniment në Spanjë, ku ylli i muzikës shqiptare është pritur shumë mirë. Ronela ka ndarë një video nga performanca e saj në Madrid, teksa ka risjellë në vëmendje dhe kritikat e ashpra me të cilat është përballur.

Në postimin e saj, ajo shkruan se askush nuk u mor me veshjen e saj dhe nuk nxori justifikime për të gjetur diçka keq. Ronela shprehet se ‘Sekret’ i bëri edhe një herë tjetër të këndojnë. “Në fakt dje nuk u mor njeri as si isha veshur as nuk shpikën 100 justifikime për të gjetur patjetër diçka keq…

Po në fakt jemi në Spanjë dhe si kudo në Evropë çdo përfaqësues i shtetit pavarësisht çdo lloj rezultati kanë pasur suportin pozitiv të mediave përgjithmonë! Nejse, versioni i ri i “SEKRET” i bëri dhe njëherë tjetër njerëzit të këndojnë shqip!”, ka shkruar këngëtarja.