Edicioni i 60-të i Festivalit të Këngës në Radio Televizionin Shqiptar do të mbahet këtë vit në datat 27, 28, 29 dhjetor në Pallatin e Kongreseve. Këtë të hënë, u prezantua zyrtarisht edhe grupi që do të prezantojë tri netët live.

Ardit Gjebrea rikthehet në një edicion jubilar të 60-të të Festivalit të Këngës në rolin e prezantuesit. Por nuk do të jetë vetëm. Në krah do të ketë edhe dy partnere; Jonida Maliqi dhe Xhemi Shehu, si dhe Isli Islamin dhe Kelvi Kadillin.

“Prisni dashuri dhe muzikë të vertetë!”, ishin fjalët e Ardit Gjebreas në konferencën për shtyp të #Fest60, më 6 dhjetor.

Po kështu, janë zyrtarizuar edhe emrat që do të shkruajnë skenarin. Kozeta Kurti dhe Zefina Hasani do të jenë pjesë e Festivalit si bashkëskenariste. Në konferencën e sotme, ato zbuluan disa nga surprizat që do të shoqërojnë 3 netët e festivalit.

Nata e parë i dedikohet konkurrimit të 20 këngëtarëve, nata e dytë do t’i dedikohet nostalgjisë, me çdo emër që ka lënë gjurmë në këtë festival në 60 vjet histori dhe nata e tretë, 29 dhjetor, do të jetë e përshtatur sipas formatit të Eurovisionit.

Në Festivalin e 60-të, do të konkurojnë midis tyre këngët e interpretuara nga:

Alban Ramosaj

Denis Skura

Evi Reçi

Gjergj Kaçinari

Janex (Xhejn Kumrija)

Kastro Zizo

Kelly

Mirud

Rezarta Smaja

Ronela Hajati

Saimir Çili

Stefi dhe Endri Prifti

Shega

Urban Band

Eldis Arrnejti

Ester Zahiri

Kejsi Rrustja

Olimpia Smajlaj

Viola Xhemali

Xhuljana Pjetra